जलवायू परिवर्तनको असर मौरीमा पनि देखियो

कास्कीको चापाकोटका किसान मौरीपालनतर्फ आकर्षित

परम्परागत मूढे घार

आधुनिक घारबाट मौरी निकालेर देखाउँदै किसान

पछिल्लो समय मौरीमा पनि जलवायू परिवर्तनको असर देखिन थालेको छ । जलवायू परिवर्तनले गर्दा समयमै फूल फूल्न छाडेको र माहुरीलाई खानाको कमि भएकाले पहिलेको जस्तो मह उत्पादन नहुने मौलिपालक किसानले बताएका छन् । चाहिनेभन्दा बढि तापक्रम भएका कारण मौरी मर्ने, चरनमा ननिस्कने, मह उत्पादन नहुने जस्ता समस्या देखिएको किसानले गुनासो गरेका छन् ।

मौरीका चाकामा काम गदर्दै कामदार मौरी

यसैबीच, कास्कीको चापाकोट गाउँ विकास समितिका स्थानीय बासिन्दा मौरीपालन व्यवसायतर्फ आकर्षित भएका छन् । केही बर्ष अगाडी चापाकोट घाँटिछिनाका स्थानीय टङ्क प्रसाद पराजुलीले सुरु गर्नुभएको मौरीपालन व्यवसायलाई अहिले यहाँका अधिकांश किसानले पछ्याएका हुन् । अन्य व्यवसाय जस्तो झन्झटिलो नहुने र दिनहुँ स्याहार गर्नु नपर्ने भएकोले पनि मौरीपालन व्यवसायतर्फ लाग्ने किसानको संख्या बढ्दै गएको छ ।
अहिले चापाकोटका करिब २ सय घरमा मौरीपालन गरिएको छ । गाउँघरमै उत्पादित मह गुणस्तरिय हुने भएकाले महका लागि बजारको कुनै समस्या नरहेको किसान पराजुलीले बताउनुभयो । चापाकोटमा उत्पादित मह प्रतिकिलो ५ सय रुपैयाँमा पोखरामा बिक्री हुने गरेको छ । यहाँका मौरीपालक किसानले एक घार मौरी बेचेबापत ३ देखि ५ हजार रुपैयाँ आम्दानी गर्ने गरेका छन् । विगत ५ बर्षदेखि मौरीपालन व्यवसाय सुरु गर्नुभएका किसान पराजुलीले मात्रै गएको १ बर्षमा ८० किलो मह उत्पादन गर्नुभएको छ । यस्तै, ८० घार मौरी बेचेर अहिलेसम्म ५ लाख रुपैयाँभन्दा बढी कमाएको उहाँले बताउनुभयो ।